息魔料將重臨，發展商「見招拆招」繼續搶推高價新盤。消息透露，恒地（00012）為促銷多個市區盤特色戶，擬提供高達樓價七成按揭，屬集團喺一手新例後提供最高成數按揭。另長實地產（01113）紅磡維港．星岸全新第5座星海譽下周開價，將引入針對非本地客稅務補貼作招徠。信置（00083）西半山Cluny Park今起開放示範單位吸客。

消息人士同劉Sir講，恒地正部署以招標形式推售旺角百匯軒同油塘嘉賢居等多個市區新盤特色大宅。
因應銀行收緊高價物業按揭等因素，恒地有意自己提供高達樓價七成按揭，以方便買家借貸入市，首三年息口大約3厘，較市面銀行一般息口略高，之後息口有機會約為最優惠利率。

凱譽趕下月驚喜價推

同時，恒地亦都積極部署重推尖沙咀服務式住宅凱譽，集團營業（一）部總經理林達民話，該盤有機會下月重推，會以驚喜價推出新一批單位，另會對海外買家提供特別置業方案。
佢又話，該樓盤喺去年四月推出，當時已賣咗50多伙，內地客佔約兩成，最快今個月收樓，按揭詳情稍後公布。

長實地產投資董事郭子威同劉Sir講，維港．星岸第5座星海譽，下周將公布首張價單同埋提早開放全新示範單位，料中秋節前正式接受認購。

佢指出，項目第1、2座買家佔逾10%係非本地客，料星海譽嘅非本地買家比例唔少於10%，故將會引入針對非本地客優惠，料提供印花稅補貼回贈。

集團今日更加會喺上海安排約1萬名代理進行推介會，星期六、日會喺內地4大城市安排300場推介會，估計吸引逾1.5萬人參與。

佢又話，將軍澳峻瀅有3至4伙未完成交易，最快月底至下月初重推，售價將會有雙位數大幅調升。
為咗介紹星海譽海景賣點，郭子威尋日仲特別租用觀光船，帶晒傳媒同理成班地產代理出海，於海上欣賞項目外貌，證明該座單位由最低層至高層單位都可享有海景。

信置Cluny Park突擊睇樓

另一方面，信置（00083）西半山干德道53號豪宅新盤Cluny Park，尋日突擊安排代理參觀現樓12樓A室示範戶，單位實用面積2,369方呎，間隔為四房全屬套房設計，並於今日起開放畀客睇。

劉Sir