俗话讲得好，「冇期望就冇失望」，正好应验喺今次嘅财政预算案之上。作为后疫情时代嘅第一份预算案，坊间普遍希望港府可以推出利民纾困措施，但又鉴於过往嘅预算案乏善可陈，市民处於一种「既期望又唔敢抱住太大希望」嘅矛盾心情之中。卒之，预算案刚公布，港人长舒一口气，果然港府「不负众望」，新一份预算案了无新意，最大变动就系派糖「减甜」，不愧於坊间讽刺嘅「特衰政府」之名。

今次嘅预算案，可以话系市民「想边样、冇边样」，又或者「想边样、减边样」！想港府继续派消费券；派，但减一半！想港府继续宽免税项；宽免，但减四成！想港府拯救楼市，喺逆周期时逐步放弃辣招；财金官员只系肯调整从价印花税税阶，但拒绝「撤辣」。一方面要继续承受辣招，另一方面派糖减甜，港人梗系唔满意啦！

呢嗱！有财金官员寻日急急脚解释，话有研究过撤辣，但认为唔适合，因为去年楼价虽然大跌，但楼价仍属高企，现时供求依然紧张，为咗畀未有楼嘅港人有优先机会，因此唔考虑撤辣！官员又话，留意到去年九成成交嘅都系首置，而且大多系中小型成交盘，所以先调整从价印花税税阶，希望帮大家悭番些少「买件家俬都好」喎。哗！官员呢个说法，唔通仲想听到市民讲句「多谢」？查实市民只想讲句「多余」！

无可否认，调整从价印花税税阶对於首次置业嘅市民嚟讲，系有少许帮助嘅！所谓「悭得一蚊得一蚊」，悭几万蚊喎，听落系几爽！问题系，家阵楼价跌势未止，外围仲要不断加息，就算系首次置业，就算有能力，都未必敢依家买楼，容乜易变埋负资产㗎！而之所以跌势未止，除咗受外围市况影响，最大问题在於受辣招影响，楼市并唔活跃，皆因大家都相信辣招只系暂时性，无论系买家定卖家现时都持观望态度。

打个比喻，港府为咗调控楼市而推行辣招，就好似为咗减重而节食，呢个方法系就系可以减到重，但并唔健康！只要停止节食，体重自然会反弹，但如果唔停止节食，身体随时出现毛病。港府现时正正系处於呢个两难局面，假如撤销「辣招」，楼价好大机会反弹，但唔撤销「辣招」，非但无助港人上楼，更会制造更多负资产业主！

谂深一层，减重系咪一定要节食呢？其实唔系！正确嘅方法系做多啲运动，同时改善饮食！如果套番落楼市嚟讲，想健康地压抑楼价，正确方法应该系增加供应量，即系觅地起楼，同时亦要增加公营房屋供应量，咁样楼价先可以健康而平稳，达致双赢局面！