楼市下滑，反而系置业时机？身兼行政会议召集人嘅议员叶刘淑仪，最近喺自住嘅中半山屋苑嘅同一幢大厦，再购买一个单位畀女儿自住。虽然斥资5,000多万元，但由於采用公司转让形式购入，叶刘节省15%嘅印花税，无形中悭咗税项逾7百万元。之不过，有银行估价，佢新购嘅物业跌价，由签署买卖合约至今，帐面损失可能达200多万元。

公司转让购入悭咗766万

话说叶刘淑仪更新利益申报，喺原有自住嘅中西区单位同荃湾嘅工商物业之外，又以今年3月成立、本港注册公司「Magic Fiddle Limited」嘅名义，「间接拥有一个位於中西区的住宅单位连一个车位作自住用途」。而新购入嘅单位，同佢现居嘅寓所属於同一幢。睇番公司注册处纪录，「Magic Fiddle Limited」嘅创办成员同董事，就系叶刘同埋佢嘅女儿叶荣欣。叶刘向传媒表示，新物业嘅购入价系5,180万元，用嚟畀女儿自住，由於以公司转让形式购入，需付税额只有0.2%，即10.36万元，等如节省15%嘅印花税，悭番约766万元。佢承认呢种买楼方法可以悭税，况且好多人都系咁做。

由於该单位未有承按纪录，换言之系一笔过付款。虽然叶刘悭咗税款，但有银行估价，该单位若撇除价值约300万元嘅车位，最新估价约4,600多万元，即是帐面损失约200多万元。